You are currently browsing the monthly archive for January 2007.
返香港的第二日，表姨媽就搵我食早餐，咁多年無見，我當然立即答應啦。早餐之後，表姨媽話可以帶我去探阿麻，我倆去買左一個小蛋糕，就上左我阿麻所住的老人院。
上到去之後，阿麻唔在床，在飯堂休息。麻麻好為食(可能我係得到佢的遺傳)，她見到蛋糕便立刻向口裡送，即使佢唔認得我同表姨媽，換句話講，佢係唔知邊個買野比佢食，但照食。其實早在1999年佢已經唔係好認得我，上次返來，佢又唔認得又聽唔到我講乜，到今次都費事理我，食為先，哈哈，老人家就是咁可愛，少左從前的怒氣橫秋。
表姨媽餵緊蛋糕的時候，我倒左杯水比阿麻，其他在附近的老人家就起哄，個個都話要飲水，又問我好多野，又同我講好多野，一下子都唔知點應付。不過，並唔係每個老人家都健康同精神，佢地大部分都坐在輪椅上，有一D就會被綁在輪椅上，我阿麻都係被綁住，因為唔綁的話，佢地可能會跌倒。其中一個不停叫我救佢，因為綁住唔舒服。另一個就好辛苦的樣子，好唔精神，仲有一個的目光一路跟著我走。在佢地的眼神入面，睇到的只有無耐，唔知可以做乜，是絕望的眼神，見唔到喜樂，見唔到動力﹐見唔到希望。他們每天也在等，等那一天的來臨。
我看著他們，諗下我年老時候的光景，突然一句說話浮現在我心中，揮之不去：他朝君體也相同。直至我離開老人院的時候，它仍跟左我一個下午。
今日又去探阿麻，買左野比佢食，她在床上想坐起身食，但唔夠力起身唔夠力坐，我要用我的手臂當作椅背頂住佢，先可以坐起身(佢的手被綁，以免從床上跌下來)，飲水的時候，我發現原來個杯對佢來講係太重。深深感受到阿麻有幾無力。
在阿麻床位附近，有一位老伯，每次都聽到佢大叫，上次同大家姐去，佢聽到我地講話二家姐結婚(因為阿麻聽唔到，所以我地同佢講野都係要大叫，附近人人都聽到。)，咁個位伯伯就大聲問：係咪有人辦喜事呀？我要做人情喎。o係邊度飲呀？記住請我喎。不斷重覆講左半個鐘直至我離開。今日佢就講：放我呀。阿仔呀，你o係邊呀？我有野同你講呀。做乜唔黎搵我呀？唔好唔理我啦。接我返去呀。
其實我都有D衝動走埋去同佢講幾句，但我驚比姑娘鬧，因為伯伯可能有少少精神病。其實後生的仔女都係因為要搵食，而安置佢地在老人院，讓護理員照顧佢地，所以未必係仔女唔理老人家。但如果我有機會可以多D探下呢班老人家，講東講西，傾下講下，唔知可唔可以帶返少少喜樂同希望比佢地呢？我知係好難，不過希望我能夠有咁的心同膽量，希望姑娘唔會鬧。
香港係美食天堂就好多人都知，唔同的地區都有一D唔同的出名食品，例如沙田乳鴿同雞粥，流浮山的海鮮，大澳的茶果，大角咀豬骨煲等等；於剛過去的星期日，小弟就有機會去左兩個香港有地道美食的地方。
筲箕灣安利魚蛋粉
早上崇拜後，就去左筲箕灣的安利魚蛋粉，多謝Tony的邀請，同埋EMM及筲箕灣潮人生命堂的弟兄姊妹，那兒的確係好介紹。先在門口見到墟陷盛況，已經知呢間野唔簡單，好在朋友們一早訂左位，否則就唔知要等幾耐先有得食啦。
安利的魚蛋，同在其他地方食到的真係唔同，魚片大大塊，勁爽超彈，咬落一啖之後，你會feel到塊魚片會好似彈弓咁，在口入面彈返起來﹐好似想彈開你個口咁樣，味道亦同平時的好唔同，好好味，芥蘭亦都好新鮮，有脆的口感同埋聲音。至於牛腩，味道唔錯，但未有試真，因為大衝忙；亦未有幾會試到片頭，爽腩(唔知係咪食左都唔知呢？)，撈粗(聽聞幾好)。不過我稔有機會的話，會再去試，不過唔知要等幾耐先有位，哈哈。
深井陳記燒鵝
晚上，去左荃灣的二家姐屋企睇佢D結婚相同DVD，之後去左深井食燒鵝，有傳深井裕記最好食，咁當然我地係等唔到位啦；不過陳記都好出名，而我一入去就有位，所以就去左陳記。最出名當然係燒鵝，果然係同普通燒臘店唔同，皮的香脆，肉的鬆化，wow，第一啖咬落去，oh no，肉好軟好香，鵝係比平時的肥，但唔會覺得膩，真係好野，我已經唔理得我的健康，食完一舊就即刻想食多舊，深井的鵝，係唔同D。其他小菜都OK啦，唔差但無驚喜。
今次返香港，食左好多地道美食，上星期四同Tony已經好似肥韜同采雲咁，去左上環，尖沙咀同大角咀食唔同的地道野，有機會再講。
早排於旺角等人其間，到一間唱片鋪行下，其中試聽CD，無意中發現左Olivia Ong的CD，吸引我試聽佢隻CD的係因為佢於A Girl Meets Bossa Nova 2專輯內的一首歌，就係最近愛上的L-O-V-E 。Olivia在大碟內將一D舊歌重新演繹，配上充滿jazz味道的旋律，我個人覺得非常好聽，Olivia的嗓子同演繹都吸引我繼續聽落去，試聽完第二集聽埋第一集。Fly Me To The Moon，另一首鐘意的舊歌，Feelin’ So Good都好好聽
A Girl Meets Bossa Nova
- Fly Me To The Moon
- Meditation
- Feelin’ So Good
- Where Is The Love
- My Favorite Things
- Love Fool
- The Girl From Ipanema
- Quiet Nights And Quiet Stars
A Girl Meets Bossa Nova 2
- So Nice
- Kiss Of Life
- Wave
- L-O-V-E
- How Insensitive
- One Note Samba
- Make It Mutual
- Driving
- Fade Away
- I’ll Move On
- Kiss Me
- Sweet Memories
第二集除左L-O-V-E好聽之外，Kiss Me都返唱得唔錯。
兩隻都很想買，$98一隻，但要控制住自己，因為未搵到工，都不可以亂洗錢呢，嘻嘻。
今日於espn.com睇到一個Nike的廣告banner，幾吸引我click入去，最主要我想睇真d呢十個NBA球員是誰，banner太小了；其次係D相都影得幾型，所以走左入去睇啦。
上面張wallpaper，唔及個banner型，因為banner crop得張相靚d，而且wallpaper的font好似唔太夾(the second coming個行字)。入到去Nike網頁，右下角可以選擇view the TV spot睇電視版廣告，成個畫面同配樂都係繼續玩有型feel。你可以click入下面條link睇睇。
如果你對籃球或nba有興趣，不妨睇埋10位球星的片段。
早排TVB在深夜重播電視劇集流金歲月，呢套劇集都幾好睇，我都幾鐘意。其中一集，男主角的叔叔勸佢幫人都要有底線，以免自己反被人欺，叔叔說了東郭先生的故事，呢個故事都幾有意義，值得留意。
故事咁的，話說趙簡子在中山打獵，將一隻惡狼追至窮途末路，狼遇上迂腐的東郭先生，向他求救，東郭先生將狼放入布袋中。趙簡子追至，問東郭先生有否看見狼，東郭先生說沒有，趙簡子提醒他勿收留惡狼，否則自找麻煩。東郭先生說他是讀書人，當然知道狼之野心可惡可怕，見了恨不得剝狼皮食狼肉，趙簡子放心而去。
東郭先生後來放中山狼出來，狼要咬他，東郭先生大叫救命。有農夫路過，東郭先生及狼找農夫論理，狼反唇相稽，說東郭先生虐待牠，把牠關在布袋裡，還對趙簡子數臭牠。農夫假裝不信，要中山狼重組案情，待狼鑽入布袋，老農立即把口袋紮緊，對東郭先生說：“這種傷害人的野獸是不會改變本性的，你對狼講仁慈，簡直太糊塗了。”說罷，掄起鋤頭，把狼打死了。
道理好簡單，幫助人都要有智慧，唔係人地叫做乜都幫，否則就會好似東郭先生咁迂腐架啦。
Recent Comments